Alla Itolae Nusa 22
Kena pusue meru lia peneka, Alla Iteheke Abrahame. Ikoti loko Abrahame be, “Abrahame!” Eleki Abrahame iralake be, “Mula, Tuhane.”
Alla Ibeteke lokoi be, “Akeu kai amu anae esane, Isake rebe aokini titinaije lolote tape Moria. Ete ndetere Au tiluke ulate sae ete ale kai apala amu anare ete Au.”
Ele bobanu bebeleite Abrahame iteta ai kena pala tanei rebe riluke ete Allare, ilo kena eni keledaije. Eleki ikeri Isake kai eni tamata makerika lua lolete otoi rebe Alla Itilukele.
Kena esi keu petua telu peneka, Abrahame iselu otoi rebe Alla Ibetekele bei lauke.
Eleki Abrahame ibeteke loko eni tamata makerike luaru be, “Luami rue ete meije kai keledaije, yo au kai auku anare luama keu lopai kena tatu loko TUHANE, pela eleki ami leu loko imi ne.”
Eleki Abrahame itolae ai kena pala tanei rebe riluke ete Allare kena Isake malaije, eleyo ruai keri sari anaije kai auwe. Eleki luasi keu sakesa.
Eleki Isake ibeteke loko amai be, “Ama!”
Abraheme iralake be, “Mula, kuanae?”
Isake itneu amai be, “Ite keri auwe kai ai peneka, po domba anai kena pala ete Allare eria?”Eleki Abrahame iralake be, “Alla ruaI aknekae domba anai mere.” Eleki luasi keu rame.
Kena esi luake me otoi rebe Alla Ibetekele, Abrahame ieleke otoi kena pala taneia rebe rilukele ete Allare, itolae aiaru ndete baba kenae. Eleki ilo eni nanare eleki itolaeni ndete baba kena aiaru.
Mere pela, irana sari anaije leke ibunu eni nanare.
Po TUHANE Eni malekate ikoti lokoi bei ndete lanite be, “Abrahame, Abrahame!”
Eleki Abrahame iralake be, “Mula, Tuhane!”
Tuhane Eni malekate ibeteke loko Abrahame be, “Abunu kwetele mere yake. Aonoi elika-elika yake. Meije Au rekwa be rilamu le Au kai nehe kena riluke amu anae esane ete Au.”
Abrahame ilimese keholi, iselu domba tulene esi sepaije ahbole kena ai butui. Eleki Abrahame irana domba mere, ipala ete TUHANE seli eni nanare.
Eleki Abrahame iono otoi mere esi nane, “TUHANE Iaknekaele.” Bei mere eti roma meije tamata esi beteke be, “Ndete TUHANE Eni ulate, Iaknekaele.”
Eleki TUHANE Eni malekete ikoti loko Abrahame bei ndete lanite suike be,
“TUHANE Ibeteke be, ‘Au la ete ruaKu, le aono meije asuka kena ariluke amu anae esane ete Au,
hoko Au riluke misete etemu boka titinai kai Au ono amu anaubuaru esi boka saka kmalea ndete lanite, kai umea ndau meite leine. Kai amu anubuaru esi nabu pusue esi musuaru.
Kai bei amu anubua meru, Au riluke misete ete pusue tamata mei nusa, le alene loko Auku pletaru.’”
Eleki Abrahame eni nanae luasi leu loko eni tamata makerika luaru eleki esi leu sakesa lope Berseba. Eleki Abrahame irue ete mere.
Pela bei mere Abrahame ilene be kwalini Nahore eni bina Milka iruele kwete mokwaia ete Nahore.
Kwetela meru: menare Use, kwalini Buse, Kemuele, rebe eni nanae kena Arame,
Kesete, Haso, Pildase, Yitlafe kai Betuele.
Betuele mere eni nanae kena Ripka.
Nahore eni bina piala eni nane Reuma, iruele Teba, Gahame, Tahase kai Maaka.